Jon 2 | MNA | STEP | Yona imbotmbot lela ye biibi kopoono leleene, mi isuŋ pa Yooba Anutu kini.

Jonah 2

Suŋŋana ki Yona

1 Yona imbotmbot lela ye biibi kopoono leleene, mi isuŋ pa Yooba Anutu kini. 2 Iso ta kembei:

“Indeeŋe ta nio aŋbotmbot la pataŋana biibi leleene na, aŋtaŋroro Yooba.
Mi ni ileŋ kalŋoŋ mi iuulu yo.
Yooba, nio aŋbotmbot sula Andewa mi aŋtaŋroro u be uulu yo.
Mi nu leŋ tiŋiizi tio.
3 Nu pundu yo ma aŋsula kat ta tai leleene a,
mi tai ilol yo ma sik.
Mi nu kam duubu biibi ma ipol ma isalakaala yo.
4 Nio aŋso ta kembei: Nu ziiri yo pa motom kek.
Tamen nio ko aŋre urum ku potomŋana mini.
5 Duubu ipol salakaala yo ma ikoto yo,
mi tai ilol yo kek.
Mi uteŋ na, mbutmbuutu tai kana ikaukau ma imap.
6 Nio aŋsula kat abal uunu ta imbot sula tai leleene a.
Lele sananŋana tana, ta ikis yo ma aŋso ko irao aŋse mini na som.
Tamen Yooba Anutu tio, nu maata yo ma aŋse pa naala,
mi iŋgi aŋbot motoŋ yaryaara.

7 “Yooba, indeeŋe ta mburoŋ ikamam be imap na, motoŋ iŋgalu mi aŋkam suŋŋana tio ima ku.
Mi nu mbotmbot lela urum ku potomŋana mi leŋ yo.

8 “Wal tau tikiskis merere kizin pakaamŋan ta ŋonon somŋan i,
na tipizil ndemen pa Merere. Tana ni ko irao imuŋai zin na som.

9 “Mi nio, nako leleŋ ambai pa kampeŋana ku mi aŋbo mboe mi aŋkam patoronŋana pu.
Mi koroŋ boozomen ta aŋbuk sua pu be aŋkam na, nio ko aŋkam. Yooba, nu itum tamen ta ulaaŋa tiam.”

10 To Yooba iso pa ye biibi tana ma ila mi iluai Yona isu peende.